Spicy Burger ~ IraqI RockeR
هلواعضاء منتدى عراقي
اليوم جبتلكم طريقتي الشنيعة بصنع الهمبركَر السبايسي
طبعا الطريقة سهلة و مينرادله دوخة و متأكد اليوم وره ماراح تقرون هذا الموضوع
كلكم راح تسدون الفنر و تروحون اتسوون سبايسي برگر
خلي افوت بالمكونات
اولا نحتاج لحم مثروم
اختصارا لهاي العملية جبت
همبرگر جاهز
و انجيب هم
صموون مدعبل
كتچب و مايونيز حاااااار
و طماطة و بصل "بصل حار"
(مكونات اضافية: فلفل اسود حار, ملح. خردل حبووب, خس, حامض)
هسه نبدي بطريقة العمل
اول شي انخلي الطاوة على النار و نخلي بالطاوة زيت
اني اخلي زيت هوااية لأن يعجبني فـ الزيت حسب كل شخص و شنو يعجبة
تنتظرون الطاوة تحمة زين, اطلعون الهمبركَر من القوطية و تخلوا بالطاوة
(لمعلوماتك: اثناء العمل عزيزتي ربة البيت تكَدرين تلبسين الهيدفونز و تسمعين اغاني اثناء العمل حتى لتضوجين و الوكت يمشي بسرعة)
الهمبركَر على النار ميحتاج مراقبة 24 ساعة
فـ نروح انيجب الطماطة و البصل بعد ما نغسلهم و انظفهم
نقطعهم على شكل سلايسات
و انظيف عليهم ملح + فلفل اسود + خردل حبووب + و حامض (حسب الرغبة)
خلصنه من البصل و الطماطة صارت تخبل
فـ انطلع الهمبركَر من النار و انخلي بالمعاون
و طبعا نسيت اكَلكم الخس شي مهم وية اللفلة
فـ انضيفة الى ماعون الهمبركَر يضيف جمالية للوجبة
(ملاحظة مهمة جدا: يجب غسل الخس جيدا قبل الاستخدام و يفضل استخادم التايد او الزاهي بغسل الخس و بعيدن يتنكَع مي و ملح لفترة من الزمن, و ذلك بسبب اشتخدام بعض المواد الفاول كولش اثناء عملية الزرع)
طريقة تقديم الوجبة
نجيب الصمونه و السچينه, نفتح الصمونه الى حد تقريبا تصير قطعتين بس احنه نخلي الصمونه متصلة من الجعب
لأن شكلهه يصير احلى بهاي الحالة,
وره مافتحنه الصمونة نخلي مايونيز و كتجب بالجزء السفلي من الصمونة و نخلطهم جيدا بواسطة
ورگة الخس, لأن خس + مياونيز = شي خوراافي
فه الطبقة الاولى تصير عبارة عن مايونيز و كتچب الطبقة الثانية خس مملطخ بالخلطة السحرية
مايونيز + كتچب
بعدين نخلي الهمبرگراية فوگهم, و فوكَ الهمبرگراية سلايسة طماطة
و بعدين سلايسة بصل بعدين سلايسة ثانية طماطة
و تصير عدكم هاي النتيجة
بوياااااااااااااااا
تخبل ما شايف لفة اطيب منهه الصراحة
جانت شي شنيع رهيب مو طبيعي
طبعا الي ميحب السبايس يتجاوز فقرة الكتچب الحار و المايونيز الحار و البصل الحار و الفلفل الاسود
و يستعمل مكونات باردة, و ابوكم الله يرحمه.
و بالنهاية اكَلكم بالعافية و الحمدالله و الشكر على هاي اللفة الشنيعة
و ان شاء الله تراووني تطبيقاتكم و اي ملاحظة اني موجود
يرجى الاتصال على الارقام التالي
130
او 104
من داخل العراق
و من خارج العراق يرجى ارسال مسجات على قناة اغانينا و سيتم الرد عليها بأسرع وقت ممكن
تحياتي